کورکمن، چې په طبعي ژبه کې یې Turmeric او فعال ترکیب ته یې Curcumin وایي، یو له هغو نباتي موادو څخه دی چې د زرګونو کلونو راهیسې په دودیز درملیز سیستم کې ځانګړی ځای لري. دا له خاورې راټوکېدلی زېړ پوډر نه یوازې خوړو ته ځانګړی خوند، بوی او رنګ ورکوي، بلکې د بدن دفاعي سیستم پیاوړی کوي، د ګڼو مزمنو او وژونکو ناروغیو مخه نیسي او د بدن دننه ژور توازن رامنځته کوي.
د ساینسي څېړنو پر بنسټ، کورکمن د سرطان، زړه ناروغیو، الزایمر، مفصلونو درد او ګڼو نورو روغتیايي ستونزو پر وړاندې مؤثر انټي اکسیدان او التهاب ضد ځانګړتیاوې لري. د همدې ځانګړنو له برکته، دا بوټی اوس د نړۍ له پامه نه غورځېدونکی طبعي درمل ګڼل کېږي، چې د خوړو تر څنګ د درملنې، پوستکي، وېښتو او هاضمې د تقویې په برخه کې هم پراخه کارونه لري.
په دې علمي او روغتیايي مطلب کې به د کورکمن د غذایي ارزښت، درملیزو ګټو، کارولو طریقو او اړینو احتیاطونو په اړه بشپړ معلومات درسره شریک کړو، تر څو دا طلایي پخليز مصالحه په خپل ورځني ژوند کې د ښهوالي، وقایې او درملنې لپاره وکاروئ.
۱. د کورکمن روغتیايي ګټې
- د سرطان مخنیوی:
کورکمن د «کرکومین» (Curcumin) په نوم فعال مرکب لري، چې د ساینسي څېړنو له مخې د سرطان حجرې له منځه وړي، په ځانګړي ډول د کولمو، پروستات، سینې او رحم سرطان خطر کموي. - د زړه ناروغیو مخنیوی:
کورکمن د وینې جریان ته وده ورکوي، د وینې لخته کېدو مخه نیسي او د کولېسټرول اندازه راکموي. دا ټول عوامل د زړه د حملې او سکتې خطر راکمولی شي. - د الزایمر او حافظې کمزورتیا ضد:
کورکمن د دماغ التهاب کموي، حافظه پیاوړې کوي او د الزایمر ناروغۍ د پېښېدو چانس تر ۷۰ سلنه پورې کموي. - د مفصلونو او بندونو درد ته شفا:
کورکمن طبیعي التهاب ضد ماده ده. له ډېر پخوا راهیسې د بندونو او د مفصلونو د درد درملنې لپاره کارېږي او اوسنی طب هم تأیید کړی دی. - د هاضمې سیسټم ښهکول:
کورکمن د معدې تېزاب تنظیموي، د کولمو باکتریاوې له منځه وړي، د معدې ګاز او نس ناستي مخنیوی کوي. - د ساه لنډۍ او ټوخي درملنه:
کورکمن د تنفسي سیستم التهاب کموي، د ټوخي ښه درمل دی او د ساه بندۍ ناروغي کابو کوي. - د پوستکي او وېښتو پاملرنه:
د کورکمن اوبو یا پوډر استعمال د ځوانکو، داغونو، د پوستکي زوړوالي او التهاب لپاره مؤثره درملنه ده. وېښتو ته ځواک ورکوي او روښانه والی زیاتوي. - د ذهني فشار، خپګان او فلج ضد:
په کورکمن کې شته ترکیبونه ذهني ارامتیا برابروي، اعصابو ته انرژي ورکوي او د دماغ حجرې فعاله ساتي. څېړنې ښيي چې د فلج وروسته د بدن د بیا رغونې لپاره هم ګټور دی. - د بدن دفاعي سیستم پیاوړتیا:
د انټي اکسیدان له امله، کورکمن د بدن د دفاعي حجراتو فعالیت زیاتوي او د ویروسي، مکروبي او مزمنو ناروغیو پر ضد ښه مقاومت رامنځته کوي. - د وینې پاکول او د ځیګر ځواکمنتیا:
کورکمن د وینې طبیعي تصفیه کوونکی دی. ځیګر له زهري موادو پاکوي، فعالیت یې تنظیموي او د بدن عمومي سمون ته وده ورکوي.
۲. د کورکمن د کارولو څرنګوالی
تاسو اړتيا نه لرئ د دې درمل د ګټه اخستيو لپاره کومه ځانګړې چاره ترسره کړئ، په مختلفو خوړو کې لکه شيدې، شات، مستې او ګرمو اوبو کې اضافه او ترې ګټه واخلئ.
- د کورکمن او شاتو ترکيب:
د کورکمن ترکيب له شاتو سره د هډوکو او مفصلونو د پياوړتيا لامل کېږي. همدارنګه دغه ماسک د پوستکي لپاره هم ګټور تمامېدای شي.
- د کورکمن او شيدو ترکيب:
د شپې له ويده کېدو د مخه يا هم د سهارنۍ مخکې د کورکمن او د شيدو ترکيب د هډوکو د روغتيا لپاره ګټور تمامېدای شي.
- د کورکمن او مستو ترکيب:
دغه ترکيب د پوستکي لپاره يو پياوړي پاکوونکی دی او د پوستکي داغونو (لکې) له منځه وړي.
- د کورکمن او ګرمو اوبو ترکيب:
له ګرمو اوبو سره د کورکمن ترکيب د پوستکي او وېښتانو د روښانتيا او د بدن د سیستم د پياوړتيا لامل کېږي.
۳. د کورکمن زيانونه:
کورکمن سره له دې چې بدن ته ډېرې ګټې لري، خو که په کارولو کې يې اعتدال په پام کې ونه نيول وشي، ښايي بدن ته ځينې ضرورنه ولري، لکه د هاضمي سیستم ستونزه، زړه بدوالی، کانګې، سر درد او نور…
۴. سپارښتنه:
کورکمن یا زردچوبه يو ډېر طبيعي درمل دي؛ که چېرېیې هره ورځ په مناسبه اندازه وکاروئ، نو کولای شئ د سرطان، زړه ناروغیو، الزایمر، مفصلدرد او ګڼو نورو مزمنو ناروغیو مخه ونیسئ. د شیدو، شاتو یا مستو سرهیې ګډ کارول، نه یواځې خوندور انتخاب دی، بلکې روغتیا ته ډېره ګټوره ده. خو پام مو وي، افراط مه کوئ – ځکه هر ګټور شی هم که زیات شي، تاوان اړولی شي.