د بلخ د کرنې ریاست مسوولین وایي له ایران څخه د کډوالو په راستنېدو سره دې ولایت کې د شنوخونو شمېر د پام وړ زیات شوی، او په وینا یې چې په تېر یو نیم کال کې شاخوا ۷۰۰ نوې شنې خونې جوړې شوي دي.
د یاد ریاست مسوولینو امید راډیو ته ویلي چې تېر کال ۸۰۰ خو سږ کال یاد ولایت کې د شنو خونو شمېر تر ۱۵۰۰ رسیدلی چې پکې بادرنګ، دومله مرچ، رومیان او یو شمېر نوره تازه ترکاري کرل کېږي.
مسوولینو ویلي چې په ځینو ولسوالیو کې د عامهپوهاوي پروګرامونه پیل شوي او ترڅنګ یې په روان کال کې ۱۳۰ بزګرانو ته د زعفرانو پیاز وېشلي او اوسمهال سروې روانه ده څو د یاد ولایت بزګرانو ته د اصلاح شويو تخومو په ګډون کیمیاوي سرې وویشي.
بلخوا د شنو خونو یو شمېر بزګرانو له امید راډیو سره په خبرو کې ویلي چې کارونه یې ښه دي خو معیاري نه دي. دوی غوښتنه کوي چې د معیاري شنوخونو د جوړېدو تر څنګ دې ورسره د وسایلو مرستې وشي او د په بندرونو کې دې د بې کیفیته کرنیزو درملو مخه ونیول شي.
د امید راډیو خبریال په راپور کې ویل شوي چې د کرنې ریاست مسوولین هم د شنوخونو د بزګرانو ستونزې مني خو وایي تر پخوا یې دې برخه ته ډېر پام کړی ځکه خو یې په شمېر کې زیاتوالی راغلی.
مسوولینو ډاډ ورکړی چې ژر به د وسایلو برخه کې له دوی سره مرستې وشي او د بازار او بې کیفیته کرنیزو توکو د واردېدو په تړاو به له اړوندو ادارو سره خبرې وکړي او شته ستونزې به یې هم حل کړي.
بلخ کې له تېر یونیم کال راهیسې ۷۰۰ نوې شنې خونې جوړې شوې
