د لوړو زده کړو وزارت په رهبرۍ او د افغانستان د کرنیزو علومو او ټکنالوژۍ ملي پوهنتون په هڅو نن د هېواد په کچه د «غذايي امنیت او خونديتوب» ملي کنفرانس په همدې پوهنتون کې پیل شي.
د لوړو زدهکړو وزارت وياند حافظ ضياءالله شاهمي وايي، په دې درې ورځني کنفرانس کې به د هېواد له ګوټ ګوټ څخه علما، استادان، څېړونکي او د افغانستان لوړپوړي مسوولين ګډون وکړي. د نوموړي په وينا، د کنفرانس په لړ کې به لسګونه څېړنیزې مقالې وړاندې شي او د عملي تطبیق لپاره به مشخص وړاندیزونه د اړوندو سکتوري وزارتونو سره شریک شي، څو د افغانستان په کچه د غذايي امنیت او خونديتوب کچه لوړه او پیاوړې شي.