د عدليې وزارت د ځمکو له غصب څخه د مخنیوي او د غصب شویو ځمکو د استرداد کمېسیون وايي، په تېر درېيو کلونو کې د هېواد په کچه ۹ استوګنيز ښارګوټي د امارتي (دولتي) ملکیت په توګه تثبيت شوي دي.
د ياد وزارت وياند قاري برکتالله رسولي د يوې خبرپاڼې په خپرولو سره ويلي، ياد ښارګوټي له ۵۰ زره جریبو څخه زياتې ځمکې رانغاړي او د اختصاصي محکمو له خوا د شرعي پرېکړو پر بنسټ امارتي اعلان شوې دي.
دغه ښارګوټي د کابل، بلخ، غزني او ننګرهار په ولايتونو کې دي، چې په هغوی کې د کابل د ملا ترهخېل، سردار محمد داوود خان او ملا عزت ښارګوټي، د بلخ د خالد بن ولید ښارګوټی، د غزني د حکیم سنایي او نوآباد ښارګوټي، او د ننګرهار د ظاهر قدیر او اسحاق ګېلاني ښارګوټي شامل دي.
کمېسیون زیاتوي، دغه پرېکړې د باوري اسناد، شواهد او معتبرو مدارکو له مخې شوې او هيڅ کله د متصرف قوم، سمت يا د اړيکو تر اغيزې لاندې نه دې راغلې.
د معلوماتو له مخې، د دغو ښارګوټو تر څنګ په تېرو درېيو کلونو کې له غاصبینو څخه شاوخوا څلور ميليونه جريبه نوره امارتي ځمکه هم بېرته استرداد شوې ده.