د یو ترکي شرکت استازي په افغانستان کې د سړک او پُل جوړونې په برخه کې پانګونې ته لېوالتیا ښودلې

د ټولګټو وزیر، ملا محمد عیسی ثاني د ترکیې بیلګیون (MVG) ساختماني شرکت له استازي «بولنت بلیګي» سره په کتنه کې د زېربنایي پروژو په اړه خبرې کړې دي.
د ټولګټو وزارت ویاند، محمد اشرف حق‌شناس په اېکس‌پاڼه لیکلي چې په دې کتنه کې ملا محمد عیسی ثاني ویلي چې افغانستان له ترکیې سره سوداګریزې، اقتصادي او ټولنیزې اړیکې لري او یاد شرکت کولای شي چې د اسلامي امارت د قوانینو او مقرراتو په رڼا کې د ټولګټو وزارت په زیربنایي پروژو کې ونډه واخلي.
بلخوا د یاد ترکي شرکت استازي ویلي: “موږ لیوالتیا لرو چې په افغانستان کې هم د سړک او پُل جوړونې په برخه کې پانګونه وکړو.”
د ټولګټو وزارت په اعلامیه کې همدراز ویل شوي چې په نږدې ورځو کې به له ترکيې هېواد څخه یو تخنیکي ټیم افغانستان ته راشي او د ټولګټو وزارت له تخنیکي ټیم سره به د سړکونو او پلونو د پروژو د تطبیق په تړاو دوامداره ناستې وکړي.