د ریاستالوزراء اداري مرستیال، مولوي عبدالسلام حنفي نن د ترکیې لپاره د اسلامي امارت له سفیر، شیخ صنیع الله فرهمند سره کتلي دي.
د اسلامي امارت مرستیال ویاند، ملا حمدالله فطرت لیکلي چې په دې کتنه کې دواړو لوریو پر بېلابېلو مسایلو خبرې کړې دي.
سرچینې د شیخ صنیع الله فرهمند له قوله ویلي چې په ترکیه کې د افغان سفارت مسوولین په بېلابېلو برخو کې د دوهاړخیزو اړیکو د پیاوړتیا کوښښ کوي، او هلته د برېښنايي تذکرو د وېش په برخه کې د اسانتیا رامنځتهکولو په ګډون مېشت افغانانو ته د خدماتو برابرولو هڅې روانې دي. بلخوا مولوي عبدالسلام حنفي په ترکیه کې د افغان سفارت له لوري هلته د افغان سوداګرو او نورو هیوادوالو د ستونزو پر حل په ټینګار کړی او په وینا یې چې په سوداګریزو، سیاسي او فرهنګي برخو کې د افغانستان او ترکیې ترمنځ د اړیکو د پراختیا لپاره دې لا هڅې وشي.