تمه ده نن شنبه د مرغومي په ۳۰مه تر ۱۹ کلنو کشره افغان کرکټ ملي لوبډله د پاکستان د ۱۹ کلنۍ لوبډلې پر وړاندې د سیالۍ ډګر ته ښکته شي.
د ۱۹ کلنو په نړیوالو یو ورځنیو لوبو کې به افغان لوبډله خپله لومړۍ سیالۍ د پاکستان پر وړاندې ترسره کړي. دا لوبه به نن د کابل پر وخت دولس نیمې بجې پیل شي.
د ۱۹ کلنو لوبډلو نړیوال جام سیالۍ د ۱۶ هیوادونو په ګډون پرون جمعه د مرغومي په ۲۹مه په سویلي افریقا کې پیل شوې.
دا سیالۍ به د ۱۶ لوبډلو ترمنځ په څلورو ګروپونو(اې، بي، سي او ډي) کې ترسره شي. افغان کرکټ ملي لوبډله په څلورم ګروپ کې راغلې چې په خپل ګروپ کې به د پاکستان، نیوزیلنډ او نیپال پر وړاندې د سیالۍ ډګر ته ووځي.
دا سیالۍ پرون پیل شوې چې په لومړۍ ورځ ایرلینډ امریکا ته او کوربه سویلي افریقا ویسټ انډیز ته ماتې ورکړه.