د ملګرو ملتونو سرمنشي انتونیو ګوتېرش په فلسطين کې د اشغال د پای ته رسېدو غوښتنه کړې او ټينګار يې کړی چې فلسطينيان بايد د کرامت، عدالت او خپلواک ژوند حق ولري.
نوموړي دا څرګندونې نن «د فلسطین له ولس سره د پيوستون نړيوالې ورځې» په مناسبت په خپل ځانګړي پيغام کې کړې دي.
سرمنشي ويلي چې په تېرو دوو کلونو کې د فلسطينيانو بنسټیز حقونه په داسې کچه نقض شوي چې تصور یې نه کېده.
ګوتېرش ټینګار کړی چې نړۍ باید د دوو دولتونو پر حل داسې بېځنډه او نهبدلېدونکې هڅې وکړي چې په هغه کې فلسطين او اسرائيل د سولې او امن په حالت کې څنګ په څنګ ژوند وکړي.
د ملګرو ملتونو د عمومي اسامبلې د ۱۹۷۷ کال د پرېکړې له مخې، د نومبر ۲۹مه د «فلسطین له ولس سره د پيوستون نړيوال ورځ» نومول شوې ده. دا ورځ د دې لپاره نمانځل کېږي چې د فلسطين د ولس د خپل برخليک ټاکلو حق او د خپلواک دولت د جوړېدو لپاره د نړیوال ملاتړ غږ پورته شي.