امریکا کې له کووېډ۱۹ واکسین وروسته د ماشومانو مړینې څېړل کېږي

د امریکا د خوړو او درملو ادارې (FDA) یو لوړپوړي چارواکي ویلي، په هېواد کې يې لږ تر لږه ۱۰ ماشومان ښايي د کووېډ–۱۹ واکسین ترلاسه کولو وروسته د زړه د التهاب له امله مړه شوي وي.
د طبي چارو مشر وینای پرساد ويلي، چې دا مړینې د واکسیناسیون له بهیر سره تړاو لري او ټینګار یې کړی چې اداره به د دغو پېښو د دقیق علت په تړاو ژوره څېړنه کوي. نوموړي زیاته کړې، چې د واکسین جوړونکو نومونه او د ماشومانو د مړینې دقیق وخت نه دی څرګند شوی.
د امریکا د ناروغیو د کنټرول او مخنیوي مرکز د شمېرو له مخې، له ۲۰۲۰ کال د جنوري تر ۲۰۲۳ کال د جون پورې په امریکا کې د ۵ او ۱۸ کلونو ترمنځ لږ تر لږه ۱۰۷۱ ماشومان د کووېډ–۱۹ ناروغۍ له امله مړه شوي دي.
دا په داسې حال کې ده چې د امریکا د روغتیا وزیر رابرټ ایف کینېډي جونیور د حکومت د کووېډ–۱۹ واکسین تګلاره بدله کړې او واکسین ته لاسرسی یې یوازې هغو کسانو ته محدود کړی چې عمر یې له ۶۵ کلونو پورته وي او یا جدي طبي ستونزې ولري.