د امریکا د کالیفورنیا ایالت په سنډیاګو ښار کې پر یوه ستر اسلامي مرکز وسلهوال برید کې پنځه کسان وژل شوي دي.
رویټرز د امریکايي پولیسو په حواله راپور ورکړی چې دوو تنکیو وسلوالو ځوانانو د سنډیاګو پر اسلامي مرکز برید کړی چې له امله یې د جومات یو ساتونکی او دوه نور کسان د ودانۍ دباندې وژل شوي دي.
پولیسو ویلي، د دواړو بریدګرو جسدونه هم موندل شوي او ګومان کېږي چې هغوی ځانونه په ډزو وژلي دي.
د سنډیاګو پولیسو مشر سکاټ وال ویلي، د اسلامي مرکز اړوند د ښوونځي ټول زدهکوونکي په خوندي ډول ایستل شوي او هېڅ ماشوم ته زیان نه دی اوښتی.
هغه زیاته کړې چې د امریکا فدرالي تحقیقاتي ادارې «افبيآی» کارکوونکي د پېښې د څېړنې لپاره سیمې ته رسېدلي او دا برید به د «نفرت له امله جرم» په توګه وڅېړل شي.
تر اوسه د برید اصلي انګېزه نه ده روښانه شوې.
بلخوا، د سنډیاګو د اسلامي مرکز امام او مشر «طه حسني» ویلي، پر عبادتځای برید ټکان ورکوونکی او د منلو نه دی.
د یادونې وړ ده چې د سنډیاګو اسلامي مرکز د کالیفورنیا او مکسیکو پولې ته نږدې تر ټولو ستر اسلامي مرکز بلل کېږي.