فعالان سیاسی و مدنی پاکستان با طرح اخراج‌اجباری مهاجران افغان از پاکستان مخالفت کردند

شماری از سیاسیون و فعالان مدنی پاکستان با طرح دولت این کشور مبنی‌بر اخراج‌اجباری مهاجرین افغان از پاکستان مخالفت کردند.
آنان این مخالفت را در یک نشست خبری که در کلوب ملی مطبوعات پاکستان برگزار شده بود، بیان کردند.
ائتلاف مشترک پناهجویان، سازمان حقوق بشر و امداد پاکستان بر ضد اخراج‌اجباری مهاجران افغان و حد اقل سه تن از نمایندگان احزاب سیاسی این کشور در این نشست حضور داشتند.
شرکت‌کنندگان در نشست یادشده خواهان توقف اخراج‌اجباری مهاجران افغان از پاکستان شده‌اند.
فعالان سیاسی و مدنی پاکستان گفته‌اند: ما خواهان انسانیت هستیم، نه اخراج اجباری.
افراد یادشده با صدور بیانیه‌ای خواسته‌های‌شان را از دولت پاکستان برای توقف اخراج‌اجباری مهاجران افغان رسماً بیان کرده‌اند.
دولت پاکستان همانند سال ۲۰۲۳ بار دیگر تصمیم گرفته تا ۱.۲ میلیون مهاجر افغان دارای کارت‌های اقامت موقت POR را از این کشور بگونه اجباری اخراج کند.
تصمیمی که با واکنش‌های داخلی در پاکستان و بین‌المللی در سطح جهان روبه‌رو شده است.