سوېلي چین سمندر کې د امریکا دوو پوځي الوتکو سقوط کړی

د امریکا د سمندري ځواکونو یوه جټ الوتکه او یوه چورلکه په دوو جلا پېښو کې د سوېلي چین سمندر ته لوېدلې ده.
د امریکا د «سي بي اس نيوز» د راپور له مخې، د دواړو الوتکو عملې روغې راایستل شوې دي.
د امریکا د سمندري ځواکونو د اقیانوس ارام څانګې ویلي، چې لومړۍ پېښه له MH-60R Sea Hawk ډوله پوځي چورلکې سره چې د «پشکانو جنګیانو» په نوم مشهوره ده رامنځته شوې ده.
شاوخوا دېرش دقیقې وروسته، یوه بله F/A-18F Super Hornet جټ الوتکه (چې د «سور خروسونو» په نوم پېژندل کېږي) هم د عادي عملیاتو پر مهال لوېدلې ده. د دې جټ دواړه پېلوټان د اضطراري وتنې (اجکشن) له لارې ځان ژغورلی او وروسته خوندي ژغورل شوي دي.
د امریکا سمندري ځواک ویلي، چې د دواړو الوتکو د سقوط لامل تر څېړنې لاندې دی.
د سوېلي چین سمندر د اقیانوس ارام یوه مهمه برخه ده چې د جنوبي ختیځې آسیا په سیمه کې موقعیت لري او شاوخوا ۳۰ سلنه نړیواله سوداګري له همدې لارې ترسره کېږي.
يادې پېښې په داسې مهال شوې، چې د امریکا ولسمشر ډونالډ ټرمپ د خپل سفر په ترڅ کې د مالیزیا او د جنوبي چین د سمندر پر ساحلونو کې دی.