د امریکا د متحده ایالتو ولسمشر ډونالډ ټرمپ د اسراییلو لومړي وزیر بنیامین نتنیاهو ته خبرداری ورکړی چې له ایران سره د روانې شخړې د پراخېدو په صورت کې ښايي اسراییل د امریکا له بشپړ ملاتړ پرته پاتې شي.
ټرمپ ویلي، اسراییل امریکا ته د ایران پر وړاندې د بریدونو له پیل څخه یوازې لږ وخت مخکې خبر ورکړی و او هغه مهال ورته ډاډ ورکړل شوی و چې عملیات به محدود وي. نوموړي زیاته کړې چې د منځني ختیځ د څو هېوادونو استازو ترې غوښتي وو څو د کړکېچ د پراخېدو د مخنیوي لپاره پر اسراییل خپل نفوذ وکاروي.
د ټرمپ په وینا، هغه نتنیاهو ته ویلي: «احتیاط وکړه، ځکه که وضعیت نور هم ترینګلی شي، ښايي ډېر ژر یوازې پاتې شې.»
بللور ته، ټرمپ څرګنده کړې چې د ایران استازو له امریکايي چارواکو سره اړیکه نیولې او پیغام یې ورکړی چې که اسراییل خپل بریدونه ودروي، تهران هم چمتو دی خپل پوځي اقدامات پای ته ورسوي.
دا څرګندونې داسې مهال کېږي چې د ایران او اسراییلو ترمنځ تاوتریخوالی د سیمې د لا پراخې بېثباتۍ په اړه اندېښنې زیاتې کړې دي.