د کانونو او پټرولیم وزیر، ملا هدایت الله بدري د اوزبیکستان له سفیر «اویبیک عثمانوف» سره په کتنه کې د ګډو همکاریو پراختیا او پیاوړتیا، د دواړو هېوادونو ترمنځ د سوداګریزو او اقتصادي اړیکو د لا ټینګښت او د افغانستان د کانونو په برخه کې د پانګونې په اړه خبرې کړې دي.
د دغه وزارت په اېکسپاڼه لیکل شوي چې په دې کتنه کې د اوزبیکستان سفیر په بېلابېلو برخو کې د اسلامي امارت لاستهراوړنې مهمې بللې د افغانستان د کانونو په برخه کې یې اوزبیکستاني پانګوالو لېوالتیا څرګنده کړې ده.
د خبرپاڼې له مخې چې نوموړي همداراز د طوطي میدان پروژې په برخه کې د شته ستونزو په اړه خپل نظرونه او وړاندیزونه شریک کړي دي.
بلخوا ښاغلي بدري مقابل لوري ته ډاډ ورکړی چې دغه وزارت به د بهرنیو پانګوالو د جذب، ملاتړ او هڅونې په موخه هراړخیزه همکاري وکړي او لا زیاتې اسانتیاوې به ورته برابرې کړي.