د ایران سپاه پاسدارانو خبر ورکړی چې نن ورځ یې د خپلو تازه عملیاتو په ترڅ کې په بحرین، کوېټ او اردن کې د امریکا پر څو پوځي اډو توغندیز او بېپیلوټه بریدونه کړي دي.
سپاه د يوې خبرپاڼې په خپرولو سره ويلي چې په بحرین کې د شیخ عیسی هوايي اډه، په اردن کې د پرنس حسن هوايي اډه او په کوېټ کې د علي السالم او احمد الجابر پوځي اډې هدف ګرځول شوې دي.
سپاه ادعا کوي چې په دې بریدونو کې د چورلکو د ترمیم مرکزونه، د بېپیلوټه الوتکو د قوماندې مرکز، د تېلو زېرمې، د پاتریوت هوايي دفاع سیسټمونه او یو ستراتیژیک رادار له منځه وړل شوي دي.
بلخوا، د کوېټ پوځ، د بحرین کورنیو چارو وزارت او د اردن پوځ ویلي چې د ایران له لوري توغول شوي توغندي او بېپیلوټه الوتکې یې شنډې کړې دي.
دغو هېوادونو له خپلو اوسېدونکو غوښتي چې امنیتي سپارښتنې مراعت او خوندي ځایونو ته پناه یوسي.
ايران: بحرین، کوېټ او اردن کې مو د امریکا پوځي اډې په نښه کړې
