د امریکا د متحده ایالتونو ولسمشر ډونالډ ټرمپ ویلي، د ایران له ماتې وروسته به په نږدې راتلونکې کې د هرمز تنګی د امریکا د قلمرو په توګه اعلان کړي.
ټرمپ په نیویارک کې یوې سیاسي غونډې ته د وینا پر مهال ادعا کړې چې ایران «سخت مات شوی» او امریکا اوس د هرمز پر تنګي بشپړ کنټرول لري.
ټرمپ دا څرګندونې داسې مهال کړې چې د امریکا او ایران ترمنځ د هرمز تنګي پر کنټرول او د بېړیو د تګ راتګ په اړه کړکېچ زیات شوی او د دې ستراتیژیکې لارې له لارې د سمندري تګ راتګ کچه نږدې درېدلې ده.
هرمز تنګی د ایران او عمان ترمنځ موقعیت لري او د نړۍ د انرژۍ په بازار کې له تر ټولو مهمو سمندري مسیرونو څخه شمېرل کېږي.