اسراييلو د یمن د تعز ښار پر یوه بازار برید کړی چې له امله يې لږ تر لږه ۷ کسان وژل شوي او ۴۰ نور ټپیان شوي دي.
الجزیرې ته د یمن حکومت سرچینو ادعا کړې چې حوثیانو بازار ته څېرمه سیمه کې یو پوځي کمپ جوړ کړی و، خو د پېښې په اړه د متضادو روایتونو او سیمې ته د محدود لاسرسي له امله د برید څرنګوالی او اصلي هدف په خپلواکه توګه نه دي تایید شوي.
بلخوا، د لبنان په جنوبي برخو کې د اسراييلو بریدونه او توپچي ډزې هم روانې دي. د راپورونو له مخې، یوې اسراييلي «اپاچي» چورلکې د میفدون سیمې ته څېرمه پر یوه سوداګریز مرکز برید کړی دی.
دغو بریدونو داسې مهال دوام موندلی چې د امریکا په منځګړیتوب د شوي اوربند د چوکاټ له شتون سره سره، په سیمه کې د نښتو او ویجاړیو راپورونه لا هم خپرېږي.