د ریاست الوزرا سیاسي مرستیال مولوي عبدالکبیر د جمعیت علمای اسلام پاکستان له مشر مولانا فضل رحمان او مله پلاوي سره په کتنه کې له افغان کډوالو سره د ناوړه چلند او په زور شړنې د لړۍ د درېدو غوښتنه وکړه.
دغه لیدنه چې د ریاست الوزرا د سیاسي مرستیال سربېره پکې د کابینې ځینو غړو برخه اخیستې وه؛ پرون یکشنبه ماښام د مرغومي په ۱۷مه د ارګ په سپېدار ماڼۍ کې ترسره شوه.
مولوي عبدالکبير وويل چې هيله شته چې کابل ته د مولانا فضل رحمان په مشرۍ د دغه پاکستاني پلاوي سفر به د افغانستان او پاکستان ترمنځ د اړيکو په ټينګښت او پياوړتيا او د ناسم پوهاوي په کمولو کې اغېزمن تمام شي.
مولوي عبدالکبیر هیله ښودلې چې مولانا فضل الرحمن او مل پلاوی د اسلامي امارت روښانه پيغام اسلام اباد ته ولېږدوي چې اسلامي امارت په سیمه کې د امن او ټیکاو غوښتونکی دی او افغان خاوره به د هېچا پر ضد نه کاریږي.
په ورته وخت کې مولانا فضل رحمان کابل ته په راتګ خوښي ښودلې او ویلي یې دي چې د دواړو هیوادونو ملتونه سره ګډ مشترکات لري او باید ستونزې د خبرو له لارې حل شي. نوموړي همداشان ویلي چې د افغان کډوالو د جبري شړنې مخالف دی او د دواړو هیوادونو د ګډ کار پلوی دی.
دغه راز په دې کتنه کې دبهرنيو چارو وزارت سرپرست مولوي اميرخان متقي د هېواد د سياسي او امنيتي حالاتو په باب معلومات وړاندې کړل .
کابل ته د مولانا فضل الرحمان په مشرۍ د پاکستاني پلاوي سفر په داسې حال کې کېږي چې په وروستیو میاشتو کې تر نیم میلیون زیات افغانان له هغه هیواده په زور ایستل شوي او افغانستان ته ستانه شوي.