د بهرنيو چارو وزير مولوي امیر خان متقي په کابل کې د ترکيې سفارت له شارژدافیر او سیاسي سلاکار جینک اونال سره د هغه د ماموريت د پای ته رسېدوله امله د «مخې ښې» کتنه کړې ده.
د ياد وزارت د مطبوعاتو او عامه اړيکو رييس حافظ ضياء احمد تکل ويلي، په دې لیدنه کې د دواړو هېوادونو تر منځ د سیاسي او اقتصادي اړیکو د پراختیا، دوهاړخیزو موضوعاتو او سیمهييزو مسایلو په اړه خبرې شوې دي.
د بهرنیو چارو وزیر د افغانستان او پاکستان د خبرو د کوربهتوب په برخه کې د ترکيې له هڅو مننه او قدرداني کړې ده.
جینک اونال چې په افغانستان کې یې ماموریت پای ته رسېږي، د اسلامي امارت د چارواکو او د بهرنیو چارو وزارت له همکاريو خوښۍ څرګندونه کړې او ويلي یې دي چې د دواړو هېوادونو د اړیکو د پیاوړتیا لپاره یې خپل ماموریت په ښه ډول ترسره کړی دی. مولوي امیر خان متقي د اونال د خدمتونو ستاینه کړې او د افغانستان او ترکيې د لا نږدو اړیکو په هیله، د هغه لپاره په راتلونکو دندو کې د بریاو غوښتنه کړې ده.