د هرات پر يو شمېر زلزله ځپلو کورنيو نوي جوړ شوي کورونه چې د یوې ترکۍ موسسې په مالي لګښت جوړ شوي وو؛ ووېشل شول.
د ترکۍ موسسې ادیف لخوا د نويو جوړو شويو کورونو پرانیسته پرون (سه شنبه د مرغومي په ۱۹مه) وشوه او مستحقو کورنیو ته ورکړل شول.
د دې موسسې چارواكو ويلي چې د دغو كورونو جوړولو دوه مياشتې وخت ونیو.
د دوی په وینا، د کورونو پر جوړولو سربېره د کور ځیني وسایل هم ورته چمتو شوي دي.
دغه کورونه د هرات ولايت د زنده جان ولسوالۍ په “ازغلک” کلي د ۲۴ مستحقو کورنیو لپاره جوړ شوي.
ورته مهال د حکومت له لوري هم د زلزله ځپلو لپاره په څو برخو کې د استوګنځایونو د جوړولو چارې روانې دي او ډېر ژر به بشپړې شي.