کورنیو چارو وزارت خبر ورکړی چې د نشهيي توکو پر وړاندې د مبارزې پولیسو په ۱۱ ولایتونو کې ۱۶۱ روږدي کسان د درملنې په موخه راټول کړي دي.
د دغه وزارت د خبرپاڼې له مخې چې دا روږدي کسان په بلخ، نیمروز، کندز، فراه، پکتیکا، پروان، میدانوردګ، پکتیا، زابل، کاپیسا او بدخشان ولایتونو کې راټول او د روږدو کسانو د درملنې مرکزونو ته ورپېژندل شوي دي.
د اسلامي امارت له بیاځلي واکمنېدو وروسته په ټول هېواد کې په نشهيي توکو د روږدو کسانو د راټولولو لړۍ پیل شوه او دا مهال په بېلابېلو روغتیایي مرکزونو کې لسګونه زره روږدي کسان تر درملنې لاندې دي.
د ویلو ده چې له تېرو شاوخوا دوو کلونو راهیسې لسګونه زره نور تر درملنې وروسته خپلو کورنیو ته روغ سپارل شوي دي.
څه موده مخکې عامې روغتیا وزارت راپور ورکړی و چې د سږ کال په لومړیو شپږو میاشتو کې له ۴۰ زرو ډېر روږدي کسان له درملنې وروسته بېرته له خپلو کورنیو سره یوځای شوي دي.
په ۱۱ ولایتونو کې سلګونه روږدي کسان راټول شوي
