د عامې روغتیا وزارت مسوولین وایي چې اوسمهال په هېواد کې د درملو ۱۳۰ تولیدي کارخونې څه باندې ۶۰۰ قلمه درمل تولیدوي.
د دغه وزارت ویاند، ډاکټر شرافت زمان امید راډیو ته ویلي د دغو کارخونو د تولیداتو د پراخېدو سره په هېواد کې د درملو د کمښت ستونزه تر یوه بریده حل شوې او د خلکو لومړنۍ اړتیاوې تر ډېره له کورني تولیده پوره کېږي.
نوموړی زیاتوي، د عامې روغتیا وزارت هڅه کوي چې په کور دننه د درملو د تولید لپاره لا زیات کار وکړي او لا ورته وده ورکړي.
د امید راډیو خبریال په راپور کې د روغتیا وزارت د ویاند له قوله ویل شوي چې په یادو کارخونو کې د کیفیت د کنټرول ځانګړي لابراتوارونه فعال شوي چې تولیدېدونکي درمل د نړیوالو معیارونو په اساس ازمایل کیږي.
د روغتیا وزارت ویاند دا هم ویلي، یاد وزارت هڅه کوي چې په هېواد کې د درملو د قاچاق مخنیوی وکړي.
عامې روغتیا وزارت: اوسمهال په افغانستان کې د درملو ۱۳۰ تولیدي کارخونې فعالیت کوي
