د کابل والي، ملا امین الله عبید وایي چې د اسلامي امارت له بیاځلي واکمنېدو وروسته زرګونه جریبه ځمکه له غاصبینو راګرځول شوې او د پروژو د تطبیق په موخه بېلابېلو دولتي ادارو ته په واک کې ورکړل شوې دي.
ښاغلي عبید دا څرګندونې د دولتي ځمکو د غصب مخنیوي او استرداد کمېسیون او د کابل ولایت د مسوولینو ترمنځ د همغږۍ په غونډه کې کړې دي.
د کابل ولایت مقام د خبرپاڼې له مخې چې بلخوا د عدلیې وزیر، شیخ عبدالحکیم شرعي ویلي چې د کابل ولایت په کچه د دولتي ځمکو د استرداد بهیر باید په بشپړ جديت، شفافیت او د شرعي او قانوني چوکاټ په رڼا کې پر مخ یووړل شي، څو عامه شتمنۍ وساتل شي او د خلکو مشروع حقوق تأمین شي.
سرچینې لیکلي چې په یاده غونډه کې ټینګار شوی چې د امنیت ټینګښت، د ولس ستونزو ته رسېدنه او د غاصبینو او زورواکو پر وړاندې جدي او عملي اقدامات به په ګډه او دوامدار ډول ترسره شي.
“د اسلامي امارت په راتګ سره زرګونه جریبه ځمکه له غاصبینو راګرځول شوې ده”
