د افغان پُست امارتي شرکت اجراييوي رييس مولوي رحمتالله مکي او ورسره مل پلاوي د اسیا ـ پسفیک پُستي ټولنې (APPU) د ۱۴مې کنګرې په څنډه کې د یادې اتحادیې له عمومي رييس وینایا پراکاش سینګ او د پُست نړیوالې ټولنې (UPU) له یو شمېر مسوولینو سره د پُستي خدمتونو د پراختیا او همکاریو د پیاوړتیا په اړه جلا جلا لیدنې کړې دي.
د افغان پُست ويلي، په دغو لیدنو کې د پُستي خدمتونو د کیفیت لوړولو، د برېښنايي سوداګرۍ، پُستي تبادلو او د نړیوالو تجربو د شریکولو په اړه بحثونه شوي دي.
د اسیا ـ پسفیک پُستي ټولنې او پُست نړیوالې ټولنې مسوولینو د افغان پُست له پلاوي سره د همکاریو پر دوام او د پُستي خدمتونو د لا پراختیا په برخه کې د هر اړخیزو همکاریو ډاډ ورکړی دی.
همدارنګه، افغان پلاوي د کنګرې په څنډه کې د بېلابېلو هېوادونو او نړیوالو پُستي بنسټونو له مسوولینو سره د ګډ کار او نویو فرصتونو د رامنځته کولو په موخه خبرې کړې او په ځینو برخو کې د همکارۍ پر هوکړو هم سلا شوي دي.