کورنیو چارو وزارت خبر ورکړی چې په پلازمېنه کابل، کندوز، بدخشان، لغمان، کاپیسا، بلخ، بامیان، نیمروز، سمنګان، پکتیکا، خوست او پروان ولایتونو کې ۵۶ کسان د نشهيي توکو د پلور او قاچاق په تړاو نیول شوي دي.
د دغه وزارت د خبرپاڼې له مخې چې له نیولشویو کسانو څخه نږدې ۶۷ کیلوګرامه ډول ډول نشهیي توکي، یو زر او ۸۵۰ نشهیي ټابليټونه او ۱۳ بورۍ د چرسو مواد ترلاسه شوي دي.
سرچینې لیکلي چې نیول شوي کسان به له لومړنیو څېړنو وروسته عدلي او قضایي بنسټونو ته ور وپېژندل شي.
د اسلامي امارت له بیاځلي واکمنېدو وروسته په ټول هېواد کې د نشهيي توکو پر هر ډول کاروبار کلک بندیز لګېدلی او له تېرو څه باندې څلورو کلونو راپدېخوا په یو شمېر ولایتونو کې د نشهيي توکو لسګونه کارخونې هم له منځه وړل شوې دي.