د هلمند د فرعي ګمرکاتو ریاست خبر ورکړی چې د تېرو اوو ورځو په لړ کې یې د لښکرګاه ښار او د ګرمسېر ولسوالۍ د ریګ سیمې په بېلابېلو برخو کې د ۱۵ زره او ۲۴۱ کیلوګرامه قاچاقي خوراکي او غیرخوراکي توکو د لېږد مخه نیولې ده.
یاد ریاست د یوې خبرپاڼې په خپرولو سره ویلي، قاچاقبرو هڅه کوله چې دا توکي د اتو باروړونکو موټرو په وسیله په غیرقانوني توګه هلمند ته وارد کړي، خو د ګرځنده څارونکو ډلو له لوري نیول شوي دي.
د مسوولینو په وینا، د دې قضیې په تړاو ۱۰ تنه نیول شوي او له لومړنیو پلټنو وروسته اړوندو ارګانونو ته ورپېژندل شوي دي.
د هلمند د فرعي ګمرکاتو ریاست ټینګار کړی چې د قاچاق د مخنیوي لپاره به خپلې څارنې او عملیات لا هم پیاوړي وساتي.
د یادونې ده چې تر دې وړاندې هم په هلمند کې د قاچاقي توکو د لېږد په تړاو ګڼ کسان نیول شوي دي.