د خیبر پښتونخوا د ټانک ولسوالۍ په مانجهي خېل سیمه کې د پولیسو او پوځ پر ګډې امنیتي پوستې د موټربم په برید کې ۱۵ امنیتي کسان وژل شوي او پوسته په بشپړه توګه ویجاړه شوې ده.
د پاکستان پوځ د عامه اړیکو ادارې (ISPR) ویلي، بریدګرو له چاودېدونکو توکو ډک موټر د پوستې له دېوال سره ټکر کړی او د زورورې چاودنې له امله د پوستې بنسټیز جوړښت سخت زیانمن شوی دی.
د يادې ادارې په وينا، په وژل شویو کې ۱۲ پوځیان، دوه پولیس او د ځنګلونو د ادارې یو کارکوونکی شامل دی.
د راپورونو له مخې، ټپیان نږدې روغتونونو ته لېږدول شوي، په ټوله ولسوالۍ کې د امنیتي قانون د ۱۴۴ مادې له مخې بندیزونه لګېدلي او خلکو ته سپارښتنه شوې چې له غیر ضروري تګــراتګ څخه ډډه وکړي.
خيبر پښتونخوا کې پر امنیتي پوستې موټربم برید؛ ۱۵ پاکستاني سرتېري پکې وژل شوي
