د هلمند مسوولین وایي، د یاد ولایت په بهرامچې، رباط او ګرمسېر ولسوالیو کې د ۵۸٫۵ ټنه خوراکي او غیرخوراکي توکو د غیرقانوني واردولو مخه نیول شوې ده.
د دغه ولایت د اطلاعاتو او کلتور ریاست په خبرپاڼه کې ویل شوي چې د هلمند د فرعي ګمرکاتو ریاست د اړوندو استازولیو د ګرځنډه ټیمونو له لوري په تېره یوه اوونۍ کې د هغو ۵۸٫۵ ټنه خوراکي او غیرخوراکي توکو مخه نیول شوې چې په غیرقانوني توګه هېواد ته واردېدل.
د سرچینې په وینا، دا توکي په ۳۰ موټرو کې بار وو چې انساني درمل، کیله، لیمو، روب، چاکلیټ، د چرګانو چیچیان، ګوړه او همداراز غیرخوراکي توکي لکه ټوکر، تیل او بخارۍ پکې شامل وو. د هلمند مسوولینو په وینا چې په دې تړاو ۶۲ کسان نیول شوي او اړوندو ارګانونو ته ورپېژندل شوي دي.