د رياست الوزراء اداري مرستيال مولوي عبدالسلام حنفي د سوداګرۍ او پانګونې د خونې له مسوولینو او يو شمېر ملي سوداګرو سره په کتنه کې د هېواد د اقتصادي وضعيت، سوداګرۍ او پانګونې په تړاو خبرې کړې دي.
ارګ په خپره کړې خبرپاڼه کې د ښاغلي حنفي په حواله ويلي، د سوداګرو او پانګهوالو لپاره تر ټولو مهمه د ځاني او مالي امنيت خونديتوب او د حکومت له لوري د اسانتياوو رامنځته کول دي، چې اسلامي امارت په دې برخه کې د هغوی ملاتړ کړی دی.
په همدې کتنه کې سوداګرو د ټرانسپورت او د توکو د لېږد په اهمیت خبرې کړې او د اسلامي امارت له مسوولینو یې غوښتي، څو د سوداګریزو لارو او نښلوونکو نقطو لپاره ځانګړې پاملرنه وکړي.
دغه راز مولوي عبدالسلام حنفي، سوداګر او پانګهوال د هېواد په پرمختګ کې مهم بللي او زياته کړې يې ده چې اسلامي امارت په بېلابېلو برخو؛ صادرات، توليدي کارخونو او کانونو کې د کورنيو او بهرنيو پانګهوالو لپاره مناسب فرصتونه برابروي.
د رياستالوزرا اداري مرستيال سوداګرو ته ډاډ ورکړی او هغوی یې هڅولي چې د هېواد په وده او ابادۍ کې لا ډېر رول ولوبوي.
له سوداګرو او پانګهوالو سره د مولوي عبدالسلام حنفي کتنه؛ د هېواد د اقتصادي وضعيت، سوداګرۍ او پانګونې په تړاو خبرې شوې
