د ا.ا ویاند، مولوي ذبیح الله مجاهد وایي چې د اسلامي امارت د مشرتابه په حکم د کورنیو چارو وزارت اړوند د ۲۰۵ البدر قول اردو مخکنی قوماندان، ملا احمد شاه دیندوست د سرپل ولایت د والي په توګه او د ۲۰۱ خالد بن ولید قول اردو مخکنی رییس ارکان، حافظ انځر ګل عبدﷲ د لغمان ولایت د مرستیال په توګه ګومارل شوي دي.
ښاغلي مجاهد لیکلي چې د چارو ادارې لوی ریاست له اداري فساد سره د مبارزې مخکنی رییس، مولوي غلام الرحمن حیدري د ننګرهار ولایت مرستیال شوی، او د سرپل ولایت د لواء د ټولۍ قرارګاه مخکنی قوماندان، مخدوم عبدالخبیر د سمنګان ولایت د امنیه قوماندان ټاکل شوی دی.
د اسلامي امارت ویاند همداراز لیکلي چې د کندوز ولایت د استخباراتو مخکنی رییس، حاجي محمد اسماعیل فائز د لغمان ولایت د امنیې قوماندان په توګه ټاکل شوی، او د کندهار ولایت لوړ میوند ولسوالۍ مخکنی ولسوال، ملا عبدﷲ د سپین بولدک کمیسیار ګومارل شوی دی. د مولوي ذبیح الله مجاهد په وینا چې د کندهار زون حمایوي کنډک مخکنی قوماندان، حافظ سید محمد وارث د کندهار ولایت لوړ میوند د ولسوال په توګه او د کندهار مرکز اتمي امنیتي حوزې مخکنی آمر، ملا احمد ﷲ سالم د کندهار زون حمایوي کنډک د قوماندان په توګه ټاکل شوی دی.