په خپل کور کې؛ افغان لوبډلې پرلپسې دوو لوبلړیو کې زمبابوې په ګونډو کړه

افغان کرېکټ ملي لوبډلې تر شل اوریزې لوبلړۍ وروسته په یو ورځنیزو لوبو کې هم زمبابوې ملي لوبډله په خپل کور کې ماته کړه.
د لومړۍ لوبې تر لغوه کېدو وروسته افغان لوبډلې وکولی شول، د یو ورځنیزو لوبو پرلپسې دوې سیالۍ وګټي او یاد جام هم په خپل نوم کړي.
د نننۍ لوبې پچه افغان لوبډلمشر حشمت الله شهیدي وګټله او په خپله یې د توپ اچونې پرېکړه وکړه. زمبابوې په ۳۱ اورونو کې ټول لوبغاړي له لاسه ورکړل او افغان لوبډلې ته یې د ۱۲۸ منډو هدف وټاکه.
افغان لوبډلې د پیلیزو لوبغاړو په سوځېدنې یاد هدف د لوبې په ۲۷ اور کې پوره او لوبه یې وګټله.
د یادونې وړ ده چې په نننۍ لوبه کې ځوان ورو توپ اچوونکي الله محمد غضنفر تر ټولو ښه توپ اچونه وکړه او د سیالې لوبډلې ۵ لوبغاړي یې له ډګره رخصت کړل.