د معیار او کیفیت ادارې خبر ورکړی چې په آقینې بندر کې ۲۸ ټُن کمکیفیته غالۍ بېرته صادروونکي هېواد ته ورګرځول شوې دي.
د دې ادارې د خبرپاڼې له مخې چې دې محمولې له کورنیو معیارونو سره مطابقت نه درلود، او د آقینې بندر د معیار او کیفیت امریت مسلکي کارکوونکو له لوري له تخنیکي څېړنو او اړینو ازموینو وروسته مسترد شوې ده.
د معیار او کیفیت ادارې ټینګار کړی چې د هېواد په ټولو بندرونو کې د وارداتي توکو د کیفیت د څارنې او کنټرول بهیر په دوامداره توګه پرمخ وړل کیږي او د هر ډول بېکیفیته توکو د واردېدو مخه به ونیول شي.
دې ادارې تر دې مخکې هم د هېواد په بندرونو کې بېلابېل کمکیفیته توکي له ارزونې وروسته بېرته صادروونکي هېواد ته ورګرځولي، او له سوداګرو یې غوښتي وو چې هېواد ته باکیفیته توکي وارد کړي.
آقینې بندر کې د ۲۸ ټُن کمکیفیته غالیو د واردېدو مخه نیول شوې
