د اوزبیکستان د روغتیا وزارت مرستیال، ظفربیک قاسموف وايي، هېواد یې چمتو دی چې د روغتیايي خدمتونو وړاندې کولو او درملو تولید په برخو کې له افغانستان سره همکاري وکړي.
د امید راډیو خبریال د راپور له مخې، قاسموف دا څرګندونې په کابل کې د افغانستان د روغتیا دویم کورني او نړیوال نندارتون د پای په مراسمو کې کړې دي.
د نوموړي په وینا چې اوزبیکستان په مناسبه بیه د لوړ کیفیت درمل د افغانستان بازار ته وړاندې او د دغه هېواد اړتیا وړ درمل په خپلو کورنیو درمل جوړولو فابریکو کې تولیدولای شي.
ظفربیک قاسموف همداراز په راتلونکو نندارتونونو کې د اوزبیکستان د درمل جوړولو شرکتونو د پراخ ګډون او له افغانستان سره د روغتیايي همکاریو د پراختیا خبر ورکړی دی.