په کابل کې یو شمېر افغان سوداګرو امید راډیو ته ویلي چې که له پاکستان سره بیاځلي سوداګريزې لارې پرانیستل شي، دوی به له دغه هېواد سره سوداګرۍ ته ادامه ورنکړي.
د امید راډیو خبریال په راپور کې د یو شمېر سوداګرو له قوله راغلي چې اوسمهال یې د پاکستان پرځای له یو شمېر نورو هېوادونو سره د سوداګرۍ باوري لارې موندلې دي.
په راپور کې د یو افغان سوداګر، عبدالغفار احمدزي له قوله راغلي چې له نورو هېوادونو سره سوداګري د پاکستان په پرتله باکیفیته او ارزانه ده او همداراز د دوی لپاره پکې زیاتې اسانتیاوې شته.
بلخوا یو شمېر پاکستاني سوداګرو ویلي اندېښنه ښودلې چې د سوداګرۍ پر مخ د تورخم او سپینبولدک دروازو له تړلکېدو راهیسې په پاکستان کې سلګونه فابریکې په ټپه درېدلې او هره ورځ پاکستاني سوداګر میلیونونه تاوان ویني.